分類: 活動回顧

上回聚會太chur ， wine 同威一齊飲，時間係有D難控制。

所以就攪返個純wine 局，host一枝，參與既帶一枝，本來就7個人，5枝酒既，因為有新手酒友，打算俾佢試多D風味就攪成咁🤷🏻‍♂️

除左Rouanne 已經變成無氣氣泡酒比較差D之外，其他都好好。 只係酒款多又要講下野就真係不能詳錄了。 Il Poggione Brunello di Montalcino 2017 CP值超高。 Mollydooker Blue Eyed Boy Shiraz 2021 濃厚滑溜、鮮果與奶油、Vanilla和咖啡並存。 Marques de Riscal Gran Reserva 2017 少量果混和靚木香，smooth，長餘韻。 Clos Du Val Napa Valley Cabernet Sauvignon 2021 Classic ! 以下3款係印象較深

全場一致大讚。一落杯，有D flinty 、Vanilla 、熟芒果香，聞香都感覺係沉實，平靜、和諧。酒體厚，圓潤。愈擺愈有。它最吸引之處是那種在背景，淡淡的雲呢拿香，承載著上層的flinty 和果香，非常和詣，盡是一種靜謐。

哈~呢枝就太有趣，非常有「個性」，很突出的一陣鼓油味，我頗肯定這不是本來酒莊想要刻意追求的味道，只是一種特殊環境下引致的結果。但是這個風味與風乾葡萄也是另一種相合。 落杯一會，鼓油味稍稍散去，那些櫻桃、藍梅和果乾、雲呢拿、甘草和朱古力等香豐富香氣。 入口微微有點甜，稍稍一個提神的酸度，緊接著是帶甘草香的微苦。整體頗為豐富複雜。 配上肉乾也蠻配搭啊。

強烈Marmalade、杏脯、提子乾、焦糖、杏仁加上無花果香。 非常甜蜜且有著不低的酸度，平衡良好，長無花果與杏仁餘韻。 很美好。 配葡撻如同注入糖漿，一口咬下，開初多了點焦糖感， 然後蛋撻似滲出果醬，最後是蛋香與無花果，很美好啊。 再配咕嚕肉，酸甜度相當，酒與食物的味道混和，你濃我濃。 當揭去那些酸酸甜甜的氣味，剩下微微的肉香，撞上無花果與杏仁，像帶有一點甘苦， 將過於甜膩的壓下，也是很匹配。

今次又係甩碌既一次，大家工作時間、地點都唔一樣， 有早到有遲到，有早退有早走亦都有失蹤(病) ， 唔會話好”盡興”，但仍然係好開心。 開心在又可以同酒友一同探索酒既世界， 而隨著酒聚愈多，大家有更多共同回憶， 呢種共鳴真係好有Feel。 今次黎左位”師妹”，好有心去學習、去感受， 呢個真係開心既，想自己當初就係想推廣品酒文化， 想多D人去欣賞酒呢樣野，係生活中搵一D樂趣。 品酒呢回事係你有既野愈多，你得到既回饋愈多。 坐係度都好似去旅行一樣。 感恩遇上這班酒友， Cheers ~

酒海無漄，好酒無數，難得知心友，對此莊既香氣都十二分欣賞，早前聚會就已經相約年尾壓軸整返場純Ugo barbaresco 夜，期待已久 ，終於 !!

Ugo Lequio Barbaresco 2012

Ugo Lequio Barbaresco 2009

Ugo Lequio Barbaresco 2007

Ugo Lequio Barbaresco Riserva 2007

大師兄9點就開定 Riserva 07任佢bottle air , 12點 就開埋其餘果D . 3:00 點，D人遲到就預左架啦，幫手試下D狀態先啦 12 年, 醇香、皮革係有既,其他野就未見，比較之下，還是能明顯感覺到澀口，等啦 . 09年，醇香、皮革、少少dark Cho同微微焦油係底，口感柔順，ready 啦喎。 07年，比起09,多左層藍莓同鼓油，單寧已經好柔順， 連顏色都比09年輕，唔講以為呢枝先係09年。 全部都幾香到死人，試個07年Riserva ，無對比無傷害， Riserva 相對就係更集中更醇厚，我唔想講其他比較差，但Riserva 又真係確係比較深厚。

呢個日本帶返黎既煙燻蘿蔔配芝士真係不得了。 配09年就無敵夾，所有Tertiary Aromas 之後配個唔完既淡煙燻， 真係非常享受。 野食係唔會得一款，加個松露雲吞，local wine pair with local food ， 邊有可能唔夾呢?難怪大師兄開波就話今日果D一定襯。 酒香過後就係纏繞不斷既松露香，昇天啦。 (飲大左咩?又無影到相既) 約莫6點就齊晒人，酒呢，其間都不斷變化， 唔同時段，各領風騷，享受之餘亦覺得非常有趣。 初段最隱閉，最年輕，以為最「無料到」既12年， 開瓶6小時候綻放得非常迷人。 些許玫瑰、櫻桃、小紅莓、士多啤梨等很是甜美， 底下還有皮革與不能言喻的醇香，而口感亦已變得柔和，實在讓人迷醉啊。 而09年，出道即顛峰，由始至終亦都是「老酒」型，醇香醉人。 07年一直都年青與年老並行，有雜莓、咖啡，夾雜住皮革、鼓油、底下還有丁點蕃茄香氣， 單寧圓熟、口感順滑，酸度高而不會過於尖銳，也很不錯。

07 Riserva ，藍莓、甘草、胡椒、梅乾、皮革、些許菇菌和甘草。 很集中、很實在，很豐盈細膩。 其實沒有對比的話，隨便一枝都係香氣悠長，變化多端，頗堪玩味。 放在一起較勁一番又是另一種樂趣。 同場加映，Bera Rabajà Riserva Barbaresco 2016 事緣有個傻仔，聽左Barbaresco night就以為係一人帶一枝Barbaresco，仲買左好多野食，又唔係第一次聚會，到底點解會有咁既誤會都真係諗唔通。 但係咁，帶都帶左黎，唯有「辛苦」少少幫你飲左佢啦~嘻

完全唔同style ，超濃郁花香、cherry 、布冧加上香料。 奇特之處在於尾諳是如同吃完話梅帶來的咸感。 酒友們笑稱是一個流汗的印度少女hahahahahaaa

試完幾rounds都係時候晚餐。 (呢個時候到買左好多野食既酒友唔明，我地唔係一路都食緊啦咩? 仲晚餐?仲有飯?哈哈哈哈)

呢個天氣，再加飲左酒，加個暖暖既麵鼓湯窩，岩晒feel啦，而Barbaresco 既陳年氣息，配合同為發酵物既麵鼓湯，酒香過後帶出既一陣鮮甜味，good good la .

酒好，食物好，酒腳好，當然係great night . 但係以上都要朋友準備妥當先有咁既效果。 做host既又要買料又要安排，又要煮又要洗， 任何聚會都要感激host既付出，幸福非必然。 感恩感恩。 一位酒友近來胃部不適，為免出事，都係淺嚐啦， 另一位，唔駛學醫都睇得佢既攰，又係戰力大減， 今次我幫到手，平常幾口就到頂，今日都勉強都交返功課， 飲左自己果份既。出發現係屋企就已經食左「解酒丸」，又真係幫到手喎。

當然，理性飲酒，飲酒係享受，適量就夠， 食咩丸咩藥都好，只係希望酒精帶黎既傷害少D， 可以飲多2杯唔好太掃興， 事後既副作用細D，個人回魂快D，咁。 理性飲酒，理性飲酒，理性飲酒。 重要既野講三次 ! Cheers ~

唔講唔覺，大家已經一年無見。早早收工，但就遲遲唔見人🤷🏻‍♂️ 吹吹下水忽然驚覺7點半，唔等啦，食住外賣開枝白暖下場先。

1.Chateau de Saint Cosme – Micro-Cosme Blanc Sauvignon-Viognier 2022 香氣豐足，青蘋果、柚子、白花加DD蜜糖隱透其中，酸度足而唔會太刺激，尾韻就短D啦，呢D簡單討喜野，男女老幼都可以愉快飲，gdgd啦。 拎黎酒友共享原因在於係少見既S.B 溝viognier，清新得黎少左陣(我唔鍾意)既番石榴味，多左D花香，酸度略略低返D，無純S.B.咁刺激，正呀。

2.Cune – Virgen del Galir “ Valdeorras “ Godello 2023 一句講晒就係咸柑桔。其實就時間太短，俾少少時間佢開展又係另一番風味。 西班牙白，Godello Grape 我都係試過三幾次，有趣野就梗係要同酒友分享。

3.Champagne Louise Brison – a l’Aube de la Côte des Bar Extra Brut Millesime 2016

我知”正常程序”就飲檳先既，但香檳就梗係要等香檳達人到場先一齊飲啦，要睇下佢開場同air左既分別架嘛。 一開瓶好鬼蘋果、開心果加D酵姆咁，酸度係好高既，貼近既比譽，蘋果醋都確係適合既。 睇見大家既神色加comment，心真係有DD難過，年份野加60個月以上陳年，咁既價位，加之早幾日先飲完，真係誠意推介，好東西就是要分享，但好似唔係好得大家歡心，sad。 無奶油，倒佢落”大師杯”，立即2個世界，其實初飲都唔係差，大家覺得佢酸，但我個人黎講，香檳既認知就係咁酸丫嘛，好接受到喎。放落”大師杯” ，果D香氣立體晒，一層一層咁飄送出黎，非常享受。呢枝有留底，尾round 試多一口，熟蘋果加D nutty 酵母，由開初清新到宜家陳熟既感覺，成個轉化係幾迷人。

4.Frank Cornelissen – Munjebel FM Rosso Terre Siciliane IGT 2018 呢枝就攪鬼囉，唔講酒友以為我玩鬼佢地。 聽個電話返黎，又聽到”natural Wine ” ，又話咩經過馬場果陣”X”味，又咩洗腳水咁。 哼，無錯，全部都無講錯，同我第一次見識佢時諗既一模一樣，確係大家形容既加返D陳皮味咁囉。但如果我係純粹飲悶就劍走偏峰咁就太對唔住各位酒友啦，枝酒既神奇之處係會不斷變化，即使有人以”似老bur” 去形容佢，個body 都係出乎意料地輕，但佢承載既香又係出奇地多，從開初果D難以理解既”怪”味到後來出返少少紅果、橙、herbs、再有D茶又有D earthy 有D Ash，應該吸引資深飲家既。 配搭之士，果陣有人形容做洗腳水既味加芝士果陣徐係非常夾，加之軟芝士個口感好Creamy真係好正。 介紹返，佢品種係比較少見D既Nerello Mascalese .

5.Chateau Montrose – Tertio de Montrose 2017

好似無乜需要講，好classic bordeaux . 紫羅蘭、石墨、雪松、黑加倫子等香氣，好平穩，好舒服。 入口就係典雅，有骨幹，成個character 好出，好美味。 3牌都贏好多正莊。

6.Clos Du Val – Napa Valley SLD Hirondelle Vineyard Cabernet Franc 2018 最早開，又壓軸咁梗猛料。

黑果加cedar vanilla .濃郁、滑溜。 點解猛料都無多幾句形容，因為我淨係倒左一口試下佢開左未， 然後大家都話佢呢D 係好，咁就只係好囉，無特別，金錢的味道。 係我翻飲頭一round試下有無咩變化之後，再拎起個樽，就真係得返個樽= =”。

“喂呀，大佬你唔好咁痴線。” 你地之前講到無特別架喎，點解一轉眼無晒架呢??????? 呢枝野我真係預左佢rich , smooth ,有深度有變化，坐低慢慢嘆既，結果就只係輕輕果一口?

1.Ben Nevis 27 Years Delias Christmas Series 2024 53.3% 一落杯果下最出係梨、香蕉非常討喜誘人，深吸一口，沁入心肺，不得了。

尾韻果陣唔識完，花香隱藏其中既木香真係舒服到昇天。

2.Kilkerran 17 Year Old 2007/024 Single Cask 2024 20th Anniversary 54.8% 雲呢拿、輕泥煤煙燻、威化、特濃咖啡、拖肥、黑朱古力等香氣複雜迷人。 入口卻有點可惜，沒法承繼聞香時那種複雜深厚，相對聞香時有點失衝。 不知道開瓶後隔些日子會不會發展得更完美 ? 呢場聚會小弟係樂在其中，好多唔同既酒款，而唔同溫度唔同酒杯再加埋air前後又有唔同表現。對於不同既酒，有人鍾意有人唔鍾意。有酒講到好神但飲得好慢，有酒講到好普通但又光速飲晒。好多既碰撞，好豐富既交流。雖然我係wine industry,照理我比較熟wine 一D，但比起介紹酒，我更鍾意呢種”探索”，大家係同一枝酒搵到相同又搵到不同，真係好有趣。 講起原來我地已經成年無聚，希望黎緊可以多見大家幾回， 真係今日唔知聽日事，今朝有酒今朝醉啦，Cheers ~

身子弱，要休養調理下，正所謂「休養都要唞下氣」，有機會都要飲返2杯。 又去到大師兄家中作客，打開酒櫃任揀~ 炎炎夏日，梗係黎枝白開場先啦。 隨手一拎就係大師兄favorite 之一，咁隨手都中就係「整L定」(九龍城寨龍捲風口吻)啦。

1.Château LaTour-Martillac Blanc 2018 番石榴、桃、波蘿、些許檸檬，混搭點棉花糖和oak香。 入口酸度充足，尾韻是那綿綿的棉花糖混和著木香與丁點煙燻。 很不錯了，有點可惜的是中間隱透了一點酒精感，破壞了那夢幻的感覺。 而口感再圓潤一點則更合我心。 2.Le Saint-Estephe de Montrose 2015 誰會對三軍酒有期望呢?也許正是期望不高反而喜出望外。 那澎湃的玫瑰花香，加點櫻桃、雪松、石墨和雲呢拿香。 輕柔的口感，充足的酸度，和那石墨口香帶來的骨幹感。

餘韻渺漫。三軍竟然如此迷人，帶點年紀的列級波爾多確實名副其實。

既然開櫃任揀，點會少得我最鍾意既Barolo / Barbaresco呢。

3.The Vinum, Barbaresco, 2009 香氣頗為封閉，甘草香主導，帶點櫻桃香。

香氣偏弱，口感卻挽回不少分數， 入口輕滑如水(並不是指味道淡薄，而是舒適至零負擔的感覺)， 尾韻細長。雖然一反Barbaresco的複雜深沉， 但此酒讓人一口追著一口，自有其獨特的吸引力。

4.Chateau Gruaud Larose 2010 深沉的黑果香，濃縮咖啡、皮革，加上Signature 土地味。 酒體飽滿、口感圓潤，濃鬱深沉，酒液中滿滿是蓄勢待發的深厚力量。 餘韻悠長、平衡且優雅。不錯，著實不錯。

5.Vereinigte Hospitien Scharzhofberger Riesling Trockenbeerenauslese 2010 哈哈，哈哈哈。 大師兄唔提我都真係無左件事，早前大師兄話想要試試德國白，極難得有枝TBA就寄存係大師兄家中，待酒聚有緣人一同品嚐吧。呵，有緣有緣。 極濃郁的杏脯、蜜餞、蜂蜜、提子乾香氣。 那配搭著精巧酸度的一口甜蜜，整個人酸甜酸甜的，實是心花怒放。 飯後來一口可以昇天，正!! 聊聊天，喝喝酒，聽聽音樂， 晚上圍爐「漫畫想當年」，找回「當下」的生活感。 感恩。 酒重要，酒腳更重要。 Cheers ~

要辦人生大事，期間穿插大病多場，令我地一月一聚推左好幾個月， 終於，一齊賀年開心沖喜下~

開心場合，一定要有檳，黎， Pop ~

1.Boizel blanc de noirs 1er cru la montagne nv

香梨主導，混搭些許蘋果香氣。口香多了點杏仁和烤麵包。

酸度高。睇起上黎好似無乜特別，個人特愛它的「純淨」，好pure 好true ，good good 。 緊接就梗係白啦。

2.Domaine Chevalier – Ladoix 1er Cru Les Grechons Blanc 2020

燧石和奶油香突出，底下層層疊疊的一堆水果如蘋果、檸檬、

桃和蜜瓜。口感圓潤，酸度中等。淡淡的燧石、奶油與些微一點甜味餘韻、持久不散。

很好。複雜得黎唔heavy，純飲都夠滿足。

到紅勒，多位資深飲家一致讚好，真係有期待。

3.Château Les Carmes Haut-Brion 2019

呢款酒應該點描述呢?紫羅蘭和其他不同花香，紅黑色水果盤，

還有皮革、煙草和herbs，應有盡有，層層疊疊的，和諧的。

酒體中等而絲滑，入口非常的優雅，有如舞者輕柔漫舞，

踏步轉旋，帶出陣陣香氣，與她對望，挑釁的眼神充滿自信，甚至近乎睥睨。

非常誘引。收尾一刻還能炸出一下「鮮嫩多汁」的感覺才淡然退場，滿足。 輕柔過後來過豐膄迷人大反差。

4.Mollydooker Enchanted Path 2021

濃郁的黑色水果盤，加上黑朱古力、雲呢拿、奶油和胡椒香氣。

厚身，滑溜。整個口感是豐富的，充滿力量的。 去到咁豐厚已經返唔到轉頭，黎多枝重炮先。

5.Argiano Solengo 2018

成熟的黑色水果主導，混和著皮革、雲呢拿、石墨和乾草等香氣。

厚身，酸度與單寧充足，豐富而滑溜，結構良好，尾韻悠長。 今晚除左香檳係感覺單一純淨，好似係炎夏食一啖鮮梨咁fresh之外，

其餘每枝都咁豐富滿足，真係有D「爆」。 不過新年，係咁架啦，豐衣足食! 未完， 威都未出場，黎，上酒~ 1.Glenallachie 15 Year Old Single Malt Whisky Barrel：Pedro Ximénez and Oloroso sherry and hogsheads casks

Alcohol : 46%vol

葡萄乾、朱古力、核桃、無花果、香料和mocha香氣。 層次豐富活潑。我自己覺得無甚驚喜之處，但就是四平八穩， 任何場合都「包無死」既家中長備酒款。

2.Blanton‘s Gold Edition Bourbon Whiskey

深色水果、oak、焦糖、蜂蜜。

口香加了點toffee、smoky、 vanilla、 spices等。

口感圓潤，餘韻悠長。

呢類甜美系，而且表現力豐富既，對我呢D初入威士忌門既酒友係非常對胃口，哈。 今晚好開心，又見到幾位新朋友。 新一年，新朋友舊友聚首，愈飲愈有。 Cheers ~

「休息是為了走更遠的路。」，養生小休是為了喝更多的酒， 「久休復出」，到大師兄家中作客來個小放縱(姣婆守唔到寡?嘿!)。

凍左幾日氣溫又回升，黎枝香檳爽下先啦。 1.Gruet Cuvée des 3 Blancs Brut Champagne N.V. 罕見的品種組合。50% Arbane, 25% Chardonnay and 25% Pinot Blanc. 花香盛，青蘋果和梨的清新香氣。整體頗為清爽。 是不錯，只是以香檳的複雜製程，我還是期待較深邃的酒款，

單純追求清爽，實在不需付「香檳價」。

2.Le Clos des Grives Musicienne 2018

這款酒就十分有趣了，老實說，小弟也是初嚐JAURA產區，實在不知道該期待什麼。

開初聞香是「sherry+bubblegum」主導(酒友們並沒有此感受,well,我感受多一層我賺左)，加上梨、檸檬和一些礦物與焦糖。

中等酒體，入口似有若無，像忽然「空白」了一般，只留下酸度，餘韻卻是滿滿的礦物感。一個小時候我才終於感受到酒友們說的「電油」味，沒有陳熟Riesling的電油那麼「啃」，量多也持久，只是強度不是去到濃烈的程度，微微滲透著，蠻不錯的。

猜想配殼類(聖子/鮑魚?)海產應該非常適合?

初嚐Jaura區，那有資格品評什麼，個人來說覺得此酒十分吸引，世界很大，大家就不要瘋追Burgundy了(不要再抬高酒價啦!!!!)，多嚐世界各地的好東西吧。

唔覺唔覺已經到左晚飯時刻，一邊沙bu沙bu，一邊品嚐今晚既主角。

Château Dauzac 2014 / 2015 2014，黑加倫子、李子、黑莓、forestfloor夾雜著一點青味。

酸度足，餘韻中長。整體頗為優雅狡黠，甚為討喜。 2015。也是顯著的黑果，不同的是在底層輕柔地襯托著的雲呢拿香，讓整個香氣討喜程度翻了一倍。厚身，柔滑，餘韻亦長。整體十分和諧舒適。

2014是不錯，但2015著實更為出色，少了些草青，

不論酸度、酒體、餘韻都比2014高了一級。

翻查了一下bordeaux weather report,

2014年7,8月是比較冷與陰暗潮濕，而2015整年都很熱，9,10月則比較涼但陽光充足，

剛好讓葡萄有時間健康地成熟，冷涼的夜晚又可以保持酸度與香氣。

雖然天氣在每個產區都會有細微差別，但大底看來也蠻乎合理論。 既試到新產區，又溫故知新，此行不虛。

煩事壓心頭，樂亦未能盡興，期待下回與酒友來一場更瘋狂的飲宴，

正所謂，世上無事係一杯酒解決唔到，如果有，就飲夠兩杯啦。

cheers ~

開波梗係香檳浪下口先啦 ~

Pierre Baillette Coeur de Craie Blanc de Noirs Extra Brut Champagne Grand Cru ‘Verzenay’ 表現非常奇怪。香氣有點青蘋果、酸梅、些許酵母。酸度不高，氣泡缺缺。 當白酒喝還算舒適、簡單輕鬆款。作為香檳就實在不合格了。

Domaine Chevalier – Bourgogne Aligote 2019 熟梨、蜜糖、杏仁和礦物香。

入口帶些微的甜感。酒體偏厚，輕微蠟質的圓潤口感，酸度舒適。 餘韻中長，帶蜜棗、nutty和礦物。 整體平衡優雅，還不錯。 朋友話呢枝既香氣綜合起黎就係雪梨雪耳南北杏湯。 Er…….em………. 又好似……..好貼切喎，哈哈哈哈哈.

Terralsole Brunello di Montalcino 2012 Bottle

air左4個鐘。濃郁的黑加倫子，茄汁、皮革、黑朱古力， 隱透點煙絲、雲尼拿香。口感柔和，單寧圓熟，中高的酸度。頗為Juicy。 尾韻帶點甘草。結構平實。整體不錯，惜尾段還是被15%的酒精打破了那份嬌柔。 朋友認為它平淡，我卻認為它是嬌豔欲滴，欲拒還迎，喝了就停不下來。 獨飲細品，屬於一個人的恬靜。

2011 The Ultimate Edradour 9 Year Old Single Malt Scotch Whisky 58.8% Cask No.253 威杯都打爛晒，(其實wine glass都爛晒，都係新買去，到底朋友平時係飲酒劈友0.0) 無奈用住體形較細小既香檳杯頂住先。 焦糖、蜜糖、拖肥和黑朱古力，Sherry反倒是退到背後襯托著。

入口一刻就像炮仗在口中炸開，非常辛口。

風味蜂湧而出。有點年資的酒友應該會很喜歡吧。

(對我的新手朋友就有點吃力了，哈哈哈哈哈)

____________________________

很久沒見，轉眼三年，還真的彷如隔世。 有時候，沉默道盡了一切。 朋友胖了，朋友長了點白髮，朋友多了點愁緒。 朋友，離開香港了。 “時間只有 這麼多 叫安歌 會否比較傻 臨尾跟你 再拖拖 叫安歌 門未鎖 無法相見 更加多 藉安歌 刻意蹉跎 真慶幸我 被你珍惜過” 世界變了樣，沒人知道明天會怎樣。 今朝有酒今朝醉，明日愁來明日愁。 喝吧，朋友 !

蘇日一戰，標題是事後寫的，只是回想起今晚品酒的過程， 發現前段都是蘇威，後來的是日威，來嘩眾取寵一下。

Ben Nevis 10YO 朋友說，這枝10YO 是酒廠非常少量OB的其中一款。 香氣濃郁複雜，奶油、蛋糕、梨、焦糖和橡木香。 入口圓潤，感覺有著一層蠟質包覆，酒液滑過舌面後部時， 感覺就如一個水袋炸開，從很圓潤變出一點刺激，有點蜂蜜，麥芽糖和朱古力味。 tobacco 和 dack chocolate 的中長餘韻。 很不錯啊~

Glenallachie 10 yo 2021 Cask Strength Batch 6 57.8% 香氣複雜，雪梨、咖啡、dark chocolate、蜂蜜、提子乾等香氣。 入口油脂豐厚，少見的帶明顯酸感，dark chocolate 、提子乾、酸梅、成熟水果、杏仁的口香。尾段口感仍然濃稠，nutty、tobacco、dark chocolate和帶胡椒、辛香料的刺激感。 餘韻頗長。非常不錯。 嚐了幾口，每口變化不同，非常棒。

Springbank 12 Cask Strength Batch 16 toffee 、蛋糕、海鹽、桃、香蕉和、蘋果和輕輕的peat。 口感溫暖略帶咸味，蜜糖、黃色水果、皮。 餘韻長，帶辛辣感，麥香極香，感覺如像站在麥田看著大麥隨風搖擺一般。 同樣的，每口都有變化，同樣都是出色的。

小正嘉之助 Single Malt Kanosuke Distiller’s Choice 2022 蒸餾於2017年12月，熟成於桶號為17011的雪莉桶（Sherry Puncheon Cask），裝瓶於2022年03月，酒齡為4年零4個月，酒精度數為58% ABV，容量為700ml，裝瓶數為583瓶。 又雪莉又單桶又限量，仲要同香港代理合作，外在既資訊真係引死人。 嘩，一試難忘，濃烈既燒炮仗 + 酸梅湯味，兩種奇異既極端撞埋一齊，或者只有榴櫣溝臭豆腐可以媲美 ? 聽完價錢之後我沉默了。

被嘉之助折磨後，喝上厚岸大寒2022，感覺還好， 輕輕的泥煤，些許朱古力，口感輕柔，末段是淡淡的泥煤， 但口感上也輕薄如水了，且餘韻略短。 這是真實感受，因為我喝的時候並不知道它是厚岸。 天啊! 略略記得第一枝厚岸是 輕泥煤(煙燻焦木)，云呢拿和一點果甜， 入口溫暖圓潤，末段一點麥香，收結是輕淡泥煤伴帶點辛辣感的長餘韻。 後來的一款，餘韻更像是不會消失的持久。 大寒是怎麼了，在我來說，以往也絕對over price ，這款則不得不說髒話了， 酒友不是水魚，匠心去那了? 無心造就的”蘇日”大戰，結果這晚日威完敗。 前段年輕的蘇威風采萬千，且是物美價廉， 夆勸各位酒友，不要盲目追求高年份，年輕還是比較有個性。 更不需跟風追日，選對自己的口味就是最好。 Cheers~

辛苦完一輪，黎個超Casual聚會。

啤酒配雞翼，係咪好合理先~? 開場就迎合主題，Casual ~ 唔係專家，但感覺用左部機，泡沬當然多左，厚左。 黏係個嘴度果陣好似係棉花糖入面咁鬆軟鬆軟， 酒又滑D咁 ~ 有趣喎

Domaine Sigalas Assyrtiko Monemvasia 2019 來自希臘既白酒。

咦，入口都驚喜架喎。 檸檬、青檸、梨、桃、蜜糖，奶油，雲呢拿和礦物香， 要果有果要木有木，混和得頗為舒適。 酸度頗高，然而不會太刺激，尾尾帶辛辣感與橡木香的長收結。 著實不錯，惜持久力不足，約莫個半小時已經變成木桶水。

白酒配芝士一定得咩? no no no,呢款配白，完全無變得creamy， 亦帶唔出芝士香。反而配七味粉雞翼係中規中舉， 稍為提升左雞肉香，而尾尾果陣辛辣感亦相合。 ok ok 。

Mihope Enjoy Syrah Dry Red 2019 黎自中國，酒莊係，葡萄都係。 咪偏見住，中國既wine已非當年，確係有質素而值得期待既。 一輪Dark fruit 加上咖啡與雲呢拿香。香氣不算驚喜。 奇特是口感輕柔，尾韻是很愉悅的木桶且半點沒有辛辣感。

整體是優雅的，平和，深邃。 才十年的酒莊，是值得期待的。

來自希臘既紅。 老實說，是不討我歡心的。 開初很濃列的濕木味。帶著草本、紫羅蘭、紅果和菇菌香。 口感是有趣的，輕柔的，但酒液滑過舌面後，單寧卻會出來替你抓癢。 沒有喝過這產區的酒，不應妄下評論，還需日後再多多嚐試。 Wine既Section到此為止。之後係清酒同牛腸鍋既section。

清酒已經俾返晒老師，只係記得好純粹既梨香同米香。 略略有點甜，圓潤舒適。 牛腸鍋出場既時候小弟已經要走啦，

結果……..走先喇由6點講到7點半，飲多左款清酒 + 輕輕試左傳說中既牛腸鍋。 試完之後心入面真係暗自慶幸留低左。實在要講句，ichiban 架呢~ 味濃得黎唔”臭”唔俗，係掂架喎 !

美酒配佳餚，

事前既準備同事後既清潔都係好費功夫既， 非常感謝呢位酒友組織呢個聚會。

酒會最重要係咩?係酒伴呀!! 一班真心欣賞，放低成見去發掘去探索既人係好好玩既， 過左一個非常愉快既一日，感恩。

人未齊，先來輕鬆一下。

楯の川 子宝 庄内の和梨 – 酒精度8% 柔潤舒服的很，甜卻沒有一點”立”感。 尾韻一陣清新李香，沒什酒精感， 對不好酒精的朋友，是非常好的選擇。

楯の川 子宝 大吟醸 梅酒 濁酒 – 酒精度11% 用了日本高級熟成南高梅，加入山形縣著名酒藏-楯野川的大吟釀釀造。 味道濃郁，酸度很高，一口醒神。 配酸梅醬沾燒鴨也許很相合?

Kinkei スパークリング・白・辛口 淺檸檬色，豐富的油桃香，酵母伴隨。 口感Dry，酸度中等。清爽簡單的酒款。 倒是尾韻回甘有點喝完啤酒的舒爽感。

Takahata Winery Takahata Brewing Rose

紅果香氣，微甜 ，酸度充足，簡單清爽的類型。 配甜度不太高的食物應該不錯，現場配了甜麵包， 酒的甜與麵包的甜浪接浪，緊接著悠悠一陣muffin香，還不錯。

典型Muscat Bailey A 的香氣，Gamey 、 Rose 、糖果。但是沒有很突出，是相對融和的。 個人還是沒法應對這種組合~_~，略帶3分Beaujolais Cru 的影子。結果用來配Sashimi red fish很是出色，燒過的更好。獨飲有其特色，配和食則容易帶來昇華的幸福感。

Takahata Majestique l’Ogre Bleu 用到international grape 也就是international grape的感覺，黑加倫子、紫蘿蘭、櫻桃，帶點雲呢拿。酸度充足，整體也平衡，但就沒有什麼特色了。

最愛既小姬，就係一枝檸蜜，酸酸甜甜又FRESH , Ichiban 架呢~ 配CHEESE 變得CREAMY 討眾人歡喜係必然架啦， 但係配甜麵包，先有酒既甜，再有麵包既甜係底下襯托住，沾左蜜糖勁FRESH既檸檬蛋糕係個口度，尾尾係濃烈既muffin香味。好正呀~

麝香葡萄、蜂蜜和很強烈的蜜瓜香氣。甜度高，酸度足，讓酒不會過於甜膩。 配上芝士蛋糕，完全把蜜瓜的香溶入蛋糕內，而酒液引出芝士蛋糕的焦糖與蛋香。 在口中散發出強烈的幸福感。