(Photo from Decanter) 唔知AOC代表乜，係酒標睇到佢知佢係AOC其實都無用。 就輕輕了解下佢啦，不過可能要先了解左產區呢樣野先。 成個波爾多係一個大產區範圍 而波爾多入邊既Haut-Medoc係一個次產區， 而Haut-Medoc入邊既Pauillac產區係村。 有左呢少許區域範圍既概念就入主題啦!
A.O.C (Appellation d’Origine Contrôlée) 原產地命名控制係法國葡萄酒等級劃分制度既最高級別。 葡萄酒最重視Terroire（風土），相比起品質，呢個制度代表住更重要既就係”該產地出產”既意思，係該產區出既酒係反映出一種風土（格）。
先認識常見有的十二個大AOC產區，波爾多（Bordeaux）、勃根地（Burgundy）、香檳（Champagne）、盧瓦爾河谷（Loire Valley）、汝拉/薩瓦（Jura/Savoie）、 盧瓦河谷（Rhone Valley）、蒲酒萊（Beaujolais）、普羅旺斯（Provence）、朗格多克-露喜龍（Languedoc-Roussillon）、西南產區（South West France）、 科西嘉（Corsica）、阿爾薩斯（Alsace）。
產區之下會再細分次產區、次產區之下再細分係村。 當然分得愈細，所代表既”風土（格）”會愈精細。 就好似亞洲人（黃皮膚）入面既日本人（好有禮貎，守紀律）， 日本入面既東京人（都好忙碌）。 講完，都係要望下D Label 既。 Appellation Bordeaux contrôlée 法國政府擔保呢枝酒係BORDEAUX出既。
細D就係Bordeaux入面既次產區例如Medoc次產區， Appellation Medoc contrôlée
再細D就係次產區入邊既某一條村，例如Margaux村。 Appellation Margaux contrôlée
AOC下一級係VDQS – Vin Delimites de Qualite Superieure（優良地區餐酒）
酒瓶標籤標示 Appellation+產區名+Qualite Superieure。 呢個係升LV到AOC前既觀察級別，表現能夠維持就可以升LV到最高級既AOC級啦
再下一級係VIN DE PAYS (地區餐酒 )
酒瓶標籤標示 Vin de Pays + 產區名。 地區餐酒的標籤上可以標明產區，並僅限使用該產區內的葡萄汁勾兌。 而係日常餐酒中最好既酒會被升級為地區餐酒。
最下級為 VIN DE TABLE (日常餐酒)
酒瓶標籤標示 Vin de Table 可用不同地區的葡萄汁勾兌而成，但不可用歐共體外國家的葡萄汁。
其實係百佳惠康買既都係AOC 級別既葡萄酒， 要搵D低級D既可能要去法國或者內地先試到啦~哈哈! 提提你，LABEL上一定要見到Appellation XXXX contrôlée先係法國政府擔保既AOC制度。 如果LABEL上有bordeaux 而無Appellation Bordeaux contrôlée，咁其實同呢個法國政府擔單既AOC制度係無關係，信唔信佢係BORDEAUX出就自己諗啦～ 再講多次，其實就算A.O.C級別 都係指原產地(包含地理位置, 品種, 酒精含量以及種植方法等等)得到認證。 而且只能用原產地種植的葡萄釀製。 質素如何，岩唔岩你口味都只有試過先知。 cheers~
